بوردا بير سئوگي ياتار
بوردا بير سئوگي ياتار
اصلي و كرم» ناغيليني بير چوخوموز ائشيتميش و يا اوخوموشوق. بو ناغيلين چرده‌يي*، «كرم» آديندا بير موسلمان« توركون،« اصلي» آديندا بير مسيحي ارمني قيزا اولان عشقيني آنلادير. بو ناغيل، بير توركون بير ارمنييه بو قدر تميز بير سئوگي بسله‌يه بيلمه‌سييله بيرليكده، اصلي‌نين كشيش اولان باباسينين بونا كسگين موخاليف چيخماسي ايله، بو تميز سئودايي، نيسگيللي بير عاقيبته دوچار ائتديگيني گؤسترير. ايكي سئوگيلي‌يي بيربيريندن اوزاق توتماق اوچون، عاييله‌سيني گؤتوروب يوللارا دوشن كشيشي، كرم هئچ يورولمادان تعقيب ائدير. كشيش، بو عشقين صميميتي‌نين قارشيسيندا چاره‌سيز قالينجا، اصلي‌يي توخونولماغا* قارشي طلسم ائله‌يير. كرم نهايت اصلييه اولاشير آمما اونا توخونونجا اود توتوب يانير. اصلي‌ده يانير و بئله ليكله بو سئودا، بابانين عينادكار خويلارينا* قوربان گئدير.
اصلي‌نين آتاسينين «قره‌مليك» آدي و يا لقبيني داشيديغي دئييلير. ايندي ايسه بو آددا، تبريزين غربينده بير قديمي يئرلشيم يئري* و اونون‌دا ياخينليغيندا اصلي و كرمه عاييد اولدوغو سؤيله‌نن ايكي مزار واردير.
بو يازيدا اساس آلديغيم «قره‌مليك محله‌سي»نين، حتي قديم زامانلاردا بير پادشاهين گتيرتديگي بؤيوك بير ارمني قافيله‌سينين، بورايا يئرلشمه‌سييله دوزلديگي ايديعا ائديلير. بونلار و بنزر حيكايه‌لر، نه اولورسا اولسون، ايندي قره‌مليك محله‌سي، اصلي و كرمين روحونو داشيماقلا بيرليكده، بوتونويله موسلمان-تورك اينسانلاردان تشكيل تاپير
سون زامانلارا قدر بير كند ساييلان قره‌مليك، بير بيرلريني تانييان و ياخين ايليشكيلري* اولان اينسانلاري و تبريز كيمي، تاريخده دونيانين گؤزده اولان بير شهرينه ياخين اولماسي سايه‌سينده، ده‌ييشيك ايدئولوژي و آنلاييشلارا صحنه اولموش و تأثير گوجونو –مثبت و يا دا منفي- گؤسترميشدير. ياخين تاريخه عاييد اولان مشروطه حركتلري، آذربايجان دئموكرات فيرقه سي جريانلاري، و 57 اينقيلابي، بونون گؤسترگه‌لريدير
قره‌مليك» قونوم* اعتيبارييله گونئيدن گوجووار و راواسان، شرقدن شام قازان و خانه‌سازي (پيچيلر)، قوزئيدن آجي چاي و فورودگاه، غربدن مايان كند و محله‌لرينه دايانماقدادير. قره‌مليگين نوفوسو30000 حودودينده‌دير و يئتيشديريب مملكته تقديم ائتديگي آيدين، روحاني و بيلگين ساييسي، نوفوسونا گؤره ياخشي سطحده‌دير.
محله، بابا-بالا ديكتاتوريسي زامانيندا يئتيشيلمه‌ييب، حتي دؤوره‌سينه –قره‌مليكلي‌نين چاليشماسينا مئيدان وئريلمه‌ين شكيلده- صنعتي مركزلر قورولاراق و دمير يولويلا شهره اولان طبيعي باغلانتيسي كسيله‌رك، محروميتده قالميشدير. ديگر طرفدن‌ده، آجي چايين طبيعي دورومو، بير زامانلار سويو حيات بسله‌يه بيلركن، يوخاري اللرده قورولان گركسيز سدلرله آخينتي‌نين كسيلمه‌سييله، كارخانالارين شيميايي ضاييعاتي و فاضلاب تؤكونتولرييله شديداً خطره دوشوب و بو وضع، محله‌نين هاوا، توپراق و سو تميزليگينه و اكينچي‌ليگه، اوزون مودّتده ضرر وئرمكده‌دير.
شهر اينسانلاري، دونيايا آياق اويدورماق* تحوّولاتيندا، حتي بعضي ميللي و ديني ده‌يرلردن* هزينه وئرمكده ايكن*، داها تميز و صميمي قالان محله‌نين حاققي، بو اولماماليدير.
هر شئيه رغماً، «قره‌مليك»، الينده توتماغا چاليشديغي طبيعي و اينساني گؤزلليك‌لرييله، «ايپك يولو» و يا «ترابزون يولو» اولاراق ياد اولونان و تبريزدن باشلاييب محله‌دن گئچه‌رك، يوزلرجه كيلومئتير باشقا بير شهر آدينا تاخيلمادان* –بو قدر شهر اولدوغونا رغماً- گئده بيلمه‌نين ساغلاديغي آيدينليغي و تيجارت پيشه‌ليگي ياشاميش و ياشاياجاقدير. والحاصل؛
« قره‌مليك» گؤزلدير.
رسول داغسر (توفارقانلي)
چردك: هسته
توخونماق: اَل وورماق
خوي: خلق و خوي
يئرلشيم يئري: سكونت يئري
ايليشكي: رابيطه
قونوم: موقعيت
آياق اويدورماق: هماهنگ اولماق
ده‌ير: ارزيش
ايكن،يكن: اولدوغو حالدا، در حاليكه
تاخيلماق: ايليشيب قالماق
